( Cantonese / Tradition Chinese / English )
經典皇座不保
呢隻GAME都出左幾年，我都玩左幾年。原因唔係佢太好玩，係太悶我又唔忍心唔玩佢。
我將佢既劣處寫低：
1) 唔對應震動手制
2) 速度太誇張，太偏離真實感
3) 同第6代比，大概只係多左4條賽道
4) 最後的賽事同第6代一樣，都係拎左魔鬼同天使車鬥餐死
5) 關數比第6代多，其實只係加左好多無聊同重複的賽事
大致上，咁應該唔可叫做 RR 7，叫佢做 RR 6 加強版就差唔多。換句話，玩過第6集都無必要曬時間玩第7集，畫面係精緻一 D，但對玩樂的影響唔大。
為左滿足自己對RR系列的執著，我就過去幾年間，間中拎來玩幾場咁（另一原因，係去左玩GT 5)，到今日終於打爆機。不過，原來打爆左，又會多左 D 超難賽事，最後有4場我放棄左，即使拎左天使車，都係超難拎第一名，情況跟同6代相同，我就唔想好似個自閉仔咁，係咁係度磿條賽道，係度輸完又輸咁，好得閒咩！固中要做到零犯錯的難度，真係太大壓力了！我打機係求開心啫。
輕易取得天使車同魔鬼車的攻略：
如以上所講，完成左主線賽事就會出現超難的EXTREME賽，再完成多廿場左右，就會出現天使車同魔鬼車的賽事。對於 MONSTER 怪獸車果場，可能都會好難取勝，咁可以先拎左天使車再返來決勝負。
魔鬼車攻略：
呢架車會係第三圈終點前停低吋你，你就跑到第二圈掉頭輕輕力咁掂佢個車頭，只要係佢既正方（或側一 D 都無所謂），一下一下咁踩下油門，慢慢咁去推佢，留意地面的白間線，就會留意倒佢架車係有向後移，大概推到距離終點有3架車位遠，畫面會指示出你要限時內衝線，咁你就可以起程，係終點前果條隧道就快出來之前，按 X 3 的 NITROUS。就會輕易取勝！
（架車咁樣衰，你揸埋我果份啦！）
天使車攻略：
選車身最長的火箭車出賽，走到觀眾席上斜坡時，留意右邊有個小廣場可以駛入去，再駛番出來，車頭向著逆線打斜咁停係路中心，做成一個障礙將佢引入廣場。呢個時候，要停係度按實殺車制，等佢撞到你的車身就會引左佢入廣場，佢會困死自己唔識出來，咁就可以輕易取勝！
雖然呢2架最勁的車都輕易得手了，但之後有4場賽事仍然係超難，既然無第二個 ENDING 畫面，我都唔花心機玩落去了。
總結：
此遊戲的賽道係好用心去設計，但玩法巳經誇張到失去以前果種真實感，相信本作巳經唔能夠再加入 D 咩新意，無法再將呢個賽車寶座延續落去。我就好懷念 RR 4-5 果時的感覺。今日，呢隻遊戲只係賣120蚊（25.11.2013)。
沒有留言:
張貼留言